Un messatge imperiau e racontes mei	7,00 €
	Franz Kafka
	108 paginas – 14 x 22 – 2019
Un messatge imperiau e racontes mei	Revirat de l'alemand per Elisa Harrer Franz Kafka (1883-1924), l’ua de las figuras màgers de la literatura deu sègle XXau, que ns’a deishat ua òbra autan fascinanta com desconcertanta e qui a suscitat mantua interpretacion. Los dètz-e-ueit racontes retienguts ací que’s pòden léger, a un purmèr nivèu, com l’autoportrèit fragmentat d’un òmi singular, traucat de contradiccions, incapable de víver dens la realitat, e tau quau l’escritura estó un sauvanegadís e constituí lo sol lòc on pensè poder existir sancèrament. Mes aquera activitat qu’estó tanben ua hont de torments infinits tad aqueth escrivan crudanhat peu dobte e fin finau desirós que la quasi totalitat de la soa produccion estossi destrusida. Se l’òmi e l’autor e son tots sancèrs en aqueths tèxtes, ne n’ei pas mensh legitime d’i véder tanben, mei generaument, un imatge de la condicion umana, l’imatge d’un èste marchant perpetuaument sus un camin qui ne’u miarà pas jamei enlòc, d’un èste cercant perpetuaument un sens ultime qui tostemps l’escaparà.

	Lo horvari de las hadas	14,00 €
	Matilda Hiere-Susbielles & Belina Cossou
	16 x 23 – 82 paginas – 2019
Lo horvari de las hadas	Onze contes modèrnes illustrats, inspirats deus contes tradicionaus, entaus petits e entaus grans.

	Quaranta tres	5,50 €
	Felip Biu
	14 x 22 – 80 paginas – 2019 – ISBN 978-2-86866-145-6
Quaranta tres	Un òmi qui pensa aver trobat lo mejan de conéisher lo son aviéner, lo dia ordinari d’ua mair de familha modèle, un astre misteriós detectat a las pòrtas deu sistèma solar : taus son quauques uns deus subjèctes d’aquestes sèt racontes de tonalitat fantastica, tots hèra diferents los uns deus autes, qui v’emportaràn en un viatge capvath lo temps e l’espaci dinc a las termièras deus mondes explorats per l’umanitat. Ua tripla interrogacion totun que cor per aquestas paginas, a còps de faiçon evidenta, a còps mei a l’esconut, balhant au recuelh ua unitat hòrta. Ei l’òmi un èste libre o un èste sosmés a un destin implacable ? A la vita un sens ? Existeish ua transcendéncia qui, lhèu, e ns’espia ? E gausaratz, com lo narrator de Quaranta tres, partir en cèrcas de responsas shens saber çò qui trobaratz au cap deu camin ?

	Letras deu molin d'Arbús	9,50 €
	Laurent Frontère
	14 x 22 – 176 paginas – 2018
Letras deu molin d'Arbús	Arrevirat deu francés per Danièl Lafarga, Danièl Lagüèita e Joan Pèir Poquet Inspiradas peu molin d’Arbús, au ras de Sauvatèrra, l’endret deu temps de mainat de l’autor, aquestas onze novèlas que descriven l’anar de vitas divèrsas qui s’estiran haut o baish peus ueit sègles passats, mes qui son totas enrasigadas au medish parçan bearnés. Qu’i contrapassan, au demiei d’autes, un argüèitacamins dab ua agaça, dus hrairs teulèrs vertuós lèu destraviats per la frèbe de l’aur, un monstre aquatic minjagarias, miejonas suberestacadas dab un pair hontanèr, un vailet martirizat peu mèste, un emposoaire qui ei adèpte de las ostias mortifèras, un aerostièr letrut e un iroqués esbarrit. Laurent Frontère qu’ei un artista pintre, escultor e estampaire. Vadut en Bearn en 1961, qu’ei l’autor d’un vintenat d’òbras fantasiosas : romans, biografias, teatre e un album tà la joenessa. Tà la version originau d’aquesta garba de novèlas, qu’a recebut lo prèmi deus lectors de las Jornadas deu libe d’Ortès.

	Lo qui plantava arbes, e novèlas mei	9,00 €
	Jean Giono
	138 paginas – 14 x 22 – 2018
Lo qui plantava arbes, e novèlas mei	Obratge bilingüe francés / occitan gascon En acarar los qui plantan arbes e los qui’us desarrigan, lo qui saja d’adocir l’agonia d’ua lèbe nafrada e lo qui non prem pas a copar en la soa man espessa l’ala d’ua coloma deus bòscs, Giono que lhèva la medisha question qui, dens lo monde de uei, e vad n’i a pas cap de dobte, cruciau : quina ei la plaça que l’òmi aucupa dens la natura e quin ei lo ròtle que i pòt o deu jogar ? Novèlas deu recuelh : Lo qui plantava arbes Preludi de Pan Camps Lo Jaufré de la Maussan Au país deus copaires d’arbes La Gran Barrèra Radèus perduts Lo Cant deu monde

	La vie d'un tonnelier, écrite par lui-même	4,50 €
	Esparnhet
	Ortès – Per Noste – 2018 – 48 paginas – 20,5 x 14,5
La vie d'un tonnelier, écrite par lui-même	Ua edicion aprestada per Dàvid Escarpit La Vie d’un tonnelier, racontée par lui-même ne conten pas auta causa que çò d’anonciat per son títol : en 967 vèrs libres, mei una cançon a la fin, nos descriu lo caminament d’Espanhet, un juene gojat desirós de profieitar de la vita dens lo Bordèu de la Restauracion, pueis que l’essenciau de l’accion se hèi alentorn de l’annada 1823.

	Lo crimi deu comte Neville	10,00 €
	Amélie Nothomb
	14 x 22 – 74 paginas – 2016
Lo crimi deu comte Neville	Ua joena casterana qui ne's pòt pas sofrir a si medisha que cèrca a's har assassinar peu son pair entà ajudar aqueste a acomplir shens domaus la prediccion d'ua devinaira encontrada au tèrme d'ua fuga qui ne n'ei pas.

	En tot caminar	7,50 €
	Elisa Harrer
	14 x 22 – 112 paginas – 2016
En tot caminar	Francis Jammes (1868-1938) que’s passè tota la vita dens lo Sud-Oèst : de la soa Bigòrra nadau au Bascoat en passant per Bearn, qui estó la soa tèrra d’eleccion. E qu’ei a ua passejadòta capvath la soa òbra, pregondament enradigada dens lo parçan on vivó, que convidam ací lo legedor. Los poèmas e tèxtes en pròsa causits que son tots assortits de comentaris entà’n facilitar la lectura. E lo libe estant bilingu¨e, cadun que poderà caminar au son grat, en lenga gascona o en francés.

	La nòvia de l'ompra	8,50 €
	Jean Noli
	14 x 22 – 120 paginas – 2015
La nòvia de l'ompra	La Nòvia de l'ompra qu'a per encastre l'isla de Sein pendent la segonda guèrra mondiau. Lo roman que comença lo 18 de junh de 1940 après l'aperet deu generau de Gaulle. Tot dòi maridat, un joen marin pescaire qu'i deu abandonar la hemna entà arrejúnher Anglatèrra e engatjà's en las Fòrças Francesas Libras. Sus l'isla, solide qu'i viven hèra mau l'ocupacion enemiga…

	Jòb, Roman d'un òme simple	10,50 €
	Joseph Roth
	14 x 22 – 162 paginas – 2015
Jòb, Roman d'un òme simple	En ua vilòta estremada de l'Empèri Rus, Mendel Singer, un modèste regent judiu, qu'ensenha las Escrituras a joens gojats. Mendel ne supòrta pas mei las temptacions d’ua societat en contradiccion dab la soa règla de vita e que pren la decision d’emigrar dab la familha tà America. Mes hèra d'espròvas qu'atenen lo regent, qui'u van hauçar au nivèu tragic d’un Jòb modèrne. Capvath l’istòria simbolica de la familha Singer, Joseph Roth que'ns pintra un tablèu poetic e lucide de las comunautats judivas d’Euròpa centrau e orientau a la velha de la Purmèra Guèrra mondiau. Joseph Roth que vadó a Brody en l'Empèri Austro-Hongrés en1894 e que's morí a París en 1939. Qu'èra un jornalista e escrivan austrian d'origina judiva. Qu'escrivó romans de qualitat dab tecnicas narrativas tradicionaus. Qu'ei considerat com l'un deus escrivans d'Euròpa centrau màgers deu sègle XXau. La soa òbra que hè partida de la literatura de l'exili provocat peu nazisme. La revirada occitana qu'ei de Pèire Bèc qui vadó a París en 1921 e's morí a Peitius en 2014. Qu'èra un lingüista, escrivan, poèta e erudit occitan. Qu'estó professor a l'Universitat de Peitius e l'un deus especialistas màgers de la literatura occitana. Qu'estó lo purmèr lingüista qui hasó un tribalh scientific entà estandardizar l'occitan sus basas racionaus, au començament de las annadas 1970. Qu'avó un ròtle important com militant occitanista. Que participè a la fondacion de l'Institut d'Estudis Occitans deu quau estó president de 1962 a 1980.

	Siam hardits !	9,00 €
	Francés Alhet
	Ortès – Per Noste – 2014 – 120 paginas – 14 x 22
Siam hardits !	L’autor, vadut a París d’un pair gascon, qu'ei agronòme dab ua carrièra en la diplomacia. En lo recuelh de haikus "Siam Hardits", qu'evòca, de faiçon lirica e didactica, la natura e la vita en Occitania, en remandant a hèits, lòcs e personatges d’importància istorica e culturau.

	Indignatz-ve !	3,60 €
	Stéphane Hessel
	40 paginas – 125 x 210 – 2013
Indignatz-ve !	Qu'ei l'an 1 d'Indignatz-ve?! Quasi quate milions deu liberòt burèu semenats suu planeta. Jamei vist en istòria d'edicion. Un pòble d'indignats qui pren còs, de Madrid a Nava York, en passar per Tunis, Tel Aviv, Homs, Tokyo, Santiago… Dab lo pos de las edicions estrangèras – quasi quaranta país –, Stéphane Hessel qu'a precisat las soas posicions sus Israèl, la Palestina, rendut un omenatge excepcionau a l'inventaire de las Nacions unidas, lo president american Franklin Roosevelt?; qu'ei tornat sus la non-violéncia. Aqu­esta edicion d’aniversari qu'intègra aqueths ajustèrs, mes tanben correccions de legedors, shens desbrombar la fabulosa istòria d'aquera susmauta de las consciéncias. S.C / J.P.B « Si n'espèras pas, n'encontraràs pas jamei çò d'inesperat. » Eraclit (Fragment XXI)

	L'arrisolet de Miss Alison	8,50 €
	Joan Miquèu Dordeins
	96 p. – 14x22 - 2013
L'arrisolet de Miss Alison	Per estar vadut a Baiona on èi passat ua bona partida de la mea vita e on èi enqüèra tota la familha, n’èri pas anat a las hèstas despuish… annadas e annadas. Que m’avèn previengut los de casa « Ne reconeisheràs pas, qu’a fòrt cambiat, que s’es basquizat ! ». Arrèrsaut de l’eternau rivalitat enter gascons e bascos-? Repepiatges de vielhs nostalgics deu bon temps passat ? Jo, praube Tomàs, qu’èi volut anar verificar per jo medish en har deu hestaire o festaire com disen acerà. Recuelh de onze racontes qui mesclan umor, amor, drama, emocion, realitat e ficcion.

	Los tres gojats de Bòrdavielha	10,00 €
	Palay Simin
	126 paginas – 14 x 22 – 2012 – 3au edicion de l'òbra pareishuda en 1909. Presentada e anotada per Robert Darrigrand
Los tres gojats de Bòrdavielha	La vita de cada dia d'ua familha bearnesa de las capuladas, drin abans la revolucion de 1848. La situacion de l'ainat e deus capdèths a l'arribada deu dret francés esvalisaire de las tradicions e deus Fòrs de Bearn. Las pelejas enter monarquistas e republicans. Ua sintaxi autentica, ua lenga rica. Tot aquerò que hè d'aqueth roman, un utís e un document de cultura occitana de purmèra valor.

	De las soritz e deus òmis	10,00 €
	John Steinbeck
	98 p. – 14x22 - 2012
De las soritz e deus òmis	George, un òmi qui coneish la vita de barruèr e lo son amic Lennie, un òmi gran mes mainadèc, que’n van un drin a la bambòla, en cèrcas de tribalh peus camps de California. N’an pas arren sonque las pelhas que pòrtan e l’espèr que bèth dia e’s posquin trobar un endret qui sii lor, tà poder partatjar lo saunei american. Mes los sauneis qu’an un prètz. Lo brave gigant Lennie ne’s coneish pas la fòrça e quan tròban un tribalh en un ranch, que’s va cercar trebucs dab la nora deu mèste. De taus trebucs que lo son protector George ne’u poirà lhèu pas sauvar… Dab « Los arrasims de la malícia », « De las soritz e deus òmis » qu'ei l'ua de las òbras mei coneishudas de John Steinbeck, l'un deus escrivans americans màgers deu sègle XXau, qui recebó lo prèmi Nobel de literatura en 1962.

	Condes deus monts e de las arribèras	13,00 €
	editats e anotats per Jacme Boisgontier e Robèrt Darrigrand
	182 paginas - 14 x 22 – 3au edicion - 2011
Condes deus monts e de las arribèras	Trenta nau contes amassats dens las montanhas e las vaths deu Bearn e de la Bigòrra per Badiolle, Batcave, Camelat, Carrère, Charbonneau, Dejeanne, Lafore, J-V Lalanne, Lespy, Pelisson e Rondou.

	Capvath las lanas de Gasconha	10,00 €
	Amadèu Baris
	Ortès, Per Noste, 2010 – 14x22 – 130 paginas
Capvath las lanas de Gasconha	(obratge bilingüe gascon / francés) Deu Bordalés a Baiona, de la Mar Grana aus costalats d’Armanhac, Gasconha qu’ei tèrra arcuelhiva on hè bon víver, au demiei d’òmis e hemnas gaujós e amistós. Aqueste petit recuelh de contes e novèlas qu’a per mira de celebrar lo men país, la tèrra deus mens ajòus, a la quau e soi estacat còs e amna e tanben d’ajudar, au besonh, los aprenents de gascon. AMADÈU BARIS

	Escrivans Idazle	17,00 €
	collectiu
	Ortès, Per Noste, 2010 – 14x22 – 348 paginas
Escrivans Idazle	Un florilègi bilingüe d'autors bascos e gascons. Aqueste obratge collectiu hèit per las associacions Per Noste e Maiatz qu’a volut har paréisher un imatge globau de l’escritura basca e occitana de uei lo dia. Au ras d’ua tradicion orau hòrta e tostemps presenta, conte, poesia, teatre, novèlas, romans, raconte de tot escantilh que son lo paisatge de las nostas literaturas. Be son luenh de s’i trobar ací tots los escrivans e totas tas antologias ! Que son meilèu extrèits de tèxtes publicats dens la revista País Gascons e publicacions de Per Noste o de Maiatz.

	Contes de Gasconha (tòme 1)	14,00 €
	Joan francés Bladèr
	14x22 – 197 paginas
Contes de Gasconha (tòme 1)	(Navèra edicion corregida) Joan Francés Bladèr (1827-1900) de Leitora, on estó bèra pausa jutge de patz, que’s dè a la collècta deu tesaur folcloric gascon. Mes que passa los collectaires deu son temps. N’i a pas nat dobte que las honts soas e siin autenticas, e que se n’explica. Mes qu’ei segur tanben que honó, dramatizè, patinè dab lo son art de la pròsa los contes populars. Aqueth Nodier, aqueth Grimm de Gasconha qu’ei un gran escrivan qui rend aumenatge a l’engèni popular en s’i incorporar. Los contes que l’autor designa com « epics » que son caps d’òbras incontestats, classics de la literatura d’òc au medish títol que las òbras deus autors mei esmiraglants. Nat legedor non pòt escapar a la magia d’aqueras enonciacions simplas : jo sabi un conte, lo conte de la mar que canta, de la poma que dança, e de l’auseron que ditz tot, a la seguretat d’ua composicion eminentament dramatica, a l’ensabatada d’aquera Gasconha illimitada per camins fantastics, a la gravetat ponhenta deus hats umans que lo recit encadena. R. LAFONT, C. ANATOLE, Nouvelle histoire de la littérature occitane, PUF, Paris, 1971. ISBN : 978-2-86866-074-9

	Contes de Fèlix Arnaudin	15,00 €
	Fèlix Arnaudin
	(Coedicion Gascon Lanas/Per Noste, 274 paginas, 14 x 21 cm) 2005.
Contes de Fèlix Arnaudin	Edicion bilingua d’ua seleccion de contes populars deu celèbre collectaire landés, amassats dens la region de La Bohèira.

	Legendas pirenencas	11,00 €
	Marcel Abbadie
	coll. Novèlas ; 76 p. ; 14 x 21 cm
Legendas pirenencas	Que i a en los Pirenèus, un sarròt de legendas pròpias de cada parçan de la serralada. Que tornam víver las de Catalonha, deu Comenge, de Bigòrra, deu Bearn e deu Bascoat, en aqueste liberòt qui ei l’arrevirada de Légendes Pyrénéennes publicat en 2004.

	L'isla deu tesaur	14,50 €
	Robert Louis Stevenson
	211 paginas 14x22
L'isla deu tesaur	L’isla deu tesaur (Treasure Island) qu’ei un roman d’aventuras escriut per Robert Louis Stevenson e qui pareishó purmèr suu magazine Young Folks dab lo títol The Sea Cook, or Treasure Island, deu 1èr d'octobre de 1881 au 28 de genèr de 1882 en fòrma d'episòdis signats Captain George North. La parucion en volume que’s hasó en 1883, après que Stevenson avó portat hèra de modificacions au son tèxte. Que conta las aventuras de Jim en la soa expedicion en cèrcas d’un tesaur suu vaishèth la Hispaniola qui ei governat per piratas. Robert Louis Balfour Stevenson (Edimborg, lo 13 de noveme de 1850 – Upolu, Samoa, lo 3 de deceme de 1894), qu’ei un escrivan escocés. Qu’estó l'autor hèra coneishut d'istòrias fantasticas popularas e daubuas de las soas òbras, com L’isla deu tesaur e Strange Case of Dr Jekyll and Mr Hyde (L’estranh cas deu Dr. Jekyll e Mr. Hyde) que son vadudas classicas.

	Shuqueta	15,00 €
	Al Cartero
	Libe de 144 paginas – 14 x 22 cm
Shuqueta	drama en tres hèitas, en vèrs d’Al Cartero. Coedicion Per Noste, La Civada, Reclams. Lo doctor Leonce Lacoarret, alias Al Cartero, (1861-1923.0) que ns’a deishat ua òbra abondosa. Deu son teatre que devem destacar Shuqueta on l’autor denóncia los hartanèrs e pintonèrs qui mian la familha a la rueina. Qu’ei tanben un testimòni esmavent deu passatge de la civilizacion paisana tradicionau a la societat vilanèra qui destorna l’equilibri ancestrau e despòbla las campanhas bearnesas.

	Ua camada en Italia	17,00 €
	Cesari Dauger
	(2001, 286 p., 14X22 cm)
Ua camada en Italia	Presentat e metut en grafia classica per Patric Guilhemjoan. Nòtas istoricas de J. J. Fénié. Coedicion Gascon Lanas / Per Noste. Reedicion de 1901. 1899 : la question romana, lo risorgimiento italian vielh de sonque trenta ans, lo papa que's considèra presonèr a la ciutat deu Vatican despuish 1870, los republicans au poder en França, l'ahar Dreyfus, lo nacionalisme exacerbat, la desseparacion de la Glèisa e de l'Estat qui comença de puntejar. En aqueth contèxte, un curat de campanha que hè lo viatge de la soa vita : que'n va per l'Italia en cèrcas de las arradics de la soa fe e que'ns balha las soas impressions. A saber se'n ditz mei sus çò que ved o sus eth medish.

	Sonque un arríder amistós	2,00 €
	Lapassade Roger
	(1975, 171 p., 18 x 11; lexique)
Sonque un arríder amistós	Rogèr Lapassada qu'ei l'un deus mes coneguts deus escrivans bearnés contemporanèus. Que'ns parla deus sons soviers de quan èra drollòt a Aussavielha e deus contes de la nosta tradicion populara. Mes ací, lo conte qu'ei d'estructura modèrna e lo testimòni escrivut que pren la seguida de la costuma orau. Qu'ei lo rebat de l'amna gascona qui's sent miaçada per un monde destructor e en bancarrota.

	La Bíblia Valenciana	2,00 €
	Rafael Tasis, trad. du catalan en gascon par Gilabèrt Nariòo.
	(Ortès: Per Noste, 1994.- 239 p. : couv. ill. par Crestian Lamaison - coll. pròsa gascona- 18 x 11,5 cm%2
La Bíblia Valenciana	En la Barcelona de las annadas 30, en la Catalonha autonòma, lo comissariVilagut e lo jornalista Caldes que mian ua enquèsta esfarfalhada dens lo beròi monde, los erudits e plan segur los bibliofiles. Que s'i parla de libes ancians, incunables e bíblias percaçadas per l'Inquisicion. Un conte a l'encòp instructiu e qui desalena... dinc au cap.

	Contes esquiçats (Contes déchirés)	2,00 €
	Bec Pierre
	1984; 208 p. 18 x 11.0).
Contes esquiçats (Contes déchirés)	(Occitanòpolis, Lo funambul, Los quate punts cardinaus, Lo Boeing e las margaridetas, Lo tren Coralh, etc.). Ua òbra modèrna estonanta, on, sus las fondacions deu conte tradicionau, Pèir Bèc sap tornar trobar la cadéncia hòla deu monde actuau.

	Margalida, la hilha deu praube	2,00 €
	Gastellu-Sabalòt J.
	(1981, 247 p. 18 x 11; lexique).
Margalida, la hilha deu praube	Dab lo son bearnés de Sauvatèrra, Joan Gastellu-Sabalòt que'ns conta la vita de dus menusèrs caminaires enter 1870 e 1914. òbra proletariana au sens totau deu mot, tablèu autentic deu tribalh e de las costumas a l'ombra deus campanars de la vath deu Gave d'Auloron.

	Contes de Gasconha (3ème série)	2,00 €
	Bladèr J-F
	(1991, 359 p. 18 x 11.0)
Contes de Gasconha (3ème série)	Qu'ei dab aquesta darrèra garba que los Contes de Gasconha amassats per Joan-Francés Bladèr e s'acaban. Après las duas purmèras, seriosas e voadas a las granas tradicions epicas e religiosas deu país gascon, qu'avem ací d'autas aventuras mes arridolentas dab los pècs e los avisats, las bèstias qui parlan com en totas las istòrias trufandècas qui encantavan las velhadas d'autes còps. Que cau rénder aumenatge au gran lectorés qu'estó Joan-Francés Bladèr, ajòu e purmèr mèste d'estudis etnografics deu noste parçan, per aquera pèirahita que son los Contes de Gasconha.

	Contes de Gasconha (2ème série)	2,00 €
	Bladèr J-F
	(1978, 324 p. 18 x 11.0)
Contes de Gasconha (2ème série)	Que son los « Contes mistics e legendas ». Que son 65, de longor hèra desparièra, a cops hèra bracs. Qu'i encontram personatges extraordinaris com aqueth Joan de Calès qui ei ua sòrta d'Ulisses gascon ; qu'i tornam trobar las hadas deu bòsc de Miranda e las serenas deu Gèrs. Qu'i descobrim los dracs qui son esperits qui tornan dens las escuderias, com lo Mandragòt qui sòrt ua sola nueit per an e qui rapòrta ua vertadèra fortuna a'u qui'u gaha. Que i a tanben fòrças cohets e sabats e los personatges qu'i tornam trobar que son lo Becut, la Bèra Joaneton, l'òme verd, mèste de totas las bèstias qui volan.

	La pluja - Lo camin de tèrra	2,00 €
	Manciet Bernat
	(1976. 190 p. 18 x 11; lexique).
La pluja - Lo camin de tèrra	Aqueths dus romans que son la seguida deu Gojat de Noveme. Mes ací la familha que s'eslargueish au vilatge e a tot lo Lana Gran. Lo tablèu que'n balha Manciet qu'ei fidèu. Qu'ei lo pinhadar de las annadas 20, quan l'eiriau gascon (proprietat gascona landesa) ei dejà miaçat dens las suas fondacions. Segurament un mèste-libe de la pròsa occitana actuau.

	Contes de l'unic	2,00 €
	Bec Pierre
	(1977, 224 p. 18 x 11.0).
Contes de l'unic	Pèir Bèc qu'ei shens qu'un filosòfe de reputacion mondiau, qu'ei tanben un escrivan. A l'entorn d'un personatge, l'Unic, solet dens lo son genre, que representa l'autor, o meslèu lo son doble imaginari, qu'ns mia capvath los sons sauneis, los sons soviers, dens los còrns de la sua pensada e de la sua imaginacion. Qu'ei literatura mòderna dens lo son estille com dens los sons tèmas ; que pensan au cinèma de Buñuel (quauques contes que son de vertadèrs scenàrios) ; tot aquerò shens se copar deus tèmas mes classics qu'avem dens lo hòu de la harga, o dens La barba, o Jan lo pèc. L'actualitat qu'i a tanben la sua part dens Los dus daltonians on trobam la question deu Larzac. Qu'i dauneja en aqueth libe de Bèc ua sensibilitat hèra esmaventa.

	Lo hiu tibat	2,00 €
	Bec Pierre
	(1979; 221 p. 18 x 11; lexique).
Lo hiu tibat	L'Alemanha de 1943. L'esboniment deu nazisme, los soviers deu S. T. O. Pèir Bèc que'ns balha ua pintrura ironica deu cosmòs itlerian e de las suas victimas alemandas, italianas... gasconas. Brica d'òdi, brica de degrèu : un libe qui seduseish per l'aunestetat deu testimòni e de la poténcia de l'escritura.

	Garbaias burlentas	2,00 €
	Morà Pèire
	(1979. 153 p. 18 x 11; lexique).
Garbaias burlentas	Duas novèlas. « La hera de las mulas » e « Garbaias burlentas » (qui a balhat lo títol a l'ensemble) que son la descripcion dramatica de la lana segotida per la holia, dab lo huec e la fantastica hueita de las mulas. La lana en huec e la mort deu dròlle dens lo brasèr que son passatges d'antologia. L'autor que conta en un gascon natre, estonament modèrne, la sua tèrra bruslada abandonada, negada d'amarum.